Ryan Giggs var í þjálfarateymi Louis van Gaal þegar hann tók við liðinu árið 2014 og hafði gaman af því að starfa með hollenska stjóranum.

Van Gaal var rekinn úr starfi eftir tvö ár hjá United en Giggs ræddi samstarf þeirra í hlaðvarpsþætti Jamie Carragher.

„Hann var öðruvísi, hann var mjög fyrirferðamikill karakter,“ sagði Giggs um samstarfið.

Þegar þeir félagar voru að fara að hittast í fyrsta sinn til að fara yfir plönin fyrir komandi leiktíð fékk Giggs gott högg í magann.

„Í fyrsta sinn sem við hittumst þá kýldi hann mig í magann, ég fór að hitta hann með lista af leikmönnum sem ég taldi ekki nógu góða og þá sem gætum notað.“

„Ég fer upp á hótel til hans og banka, hann opnar hurðina og segir að ég sé í góðu standi. Svo kýlir hann mig bara.“

„Þetta var alvöru högg, ég gat ekki svarað til baka því þá hefði hann eflaust rekið mig úr starfi.“