Jordan Pickford markvörður Everton og eiginkona hans fara nú ekki út úr húsi nema með lífvörð sér við hlið. Frá þessu segir enska blaðið Daily Mail.
Pickford og fjölskylda hans hefur fengið mikið af hótunum eftir atvikið í leik Everton og Liverpool fyrir tæpum tveimur vikum. Pickford fór þá í tæklingu á Virgil van Dijk varnarmann Liverpool sem meiddist alvarlega.
Morðhótanir og fleira í þeim dúr hefur ratað til fjölskyldunnar og er fjölskyldan óttasleginn.
Pickford og frú ásamt ungu barni sínu búa í úthverfi Manchester og hefur fjölskyldan fengið lífverði til starfa, þeir vakta heimili þeirra og fylgja þeim ef þau yfirgefa húsið.
Fjölskyldan er sögð hrædd yfir öllum þeim hótunum sem hafa borist og er Pickford sagður staðráðinn í því að tryggja öryggi fjölskyldu sinnar.
Lífverðirnir hafa ráðlagt hjónunum að birta ekki myndir á samfélagsmiðlum, það geti gefið hugsanlegum ofbeldismönnum hugmynd um hvar þau eru stödd.
