Íslenska kvennalandsliðið laut í lægra haldi fyrir Svíþjóð í undankeppni EM í kvöld. Leikið var í Svíþjóð.

Leikurinn skipti bæði lið miklu máli. Liðin eru í harðri baráttu um efsta sæti riðilsins sem gefur sæti á EM.

Íslenska liðið byrjaði leikinn vel. Þær áttu nokkrar góðar sóknir en náðu ekki að ógna marki Svíþjóðar að ráði. Eina markskot Íslenska liðsins í fyrri hálfleik kom á 20. mínútu. Sveindís skallaði boltann inn fyrir sænsku vörnina. Þar var Karólína sem hitti boltann þó ekki vel og lítill kraftur var í skotinu.

Svíþjóð komst yfir á 25. mínútu með marki frá Sofia Jakobsson. Glódís Perla Viggósdóttir gerði sig seka um slakan skalla aftur fyrir sig sem ætlaður var Söndru í markinu. Boltinn rataði ekki á Söndru og Sofia nýtti sér það og setti boltann í markið.

Í síðari hálfleik var róðurinn þungur fyrir Ísland. Svíþjóð komst í 2-0 á 57. mínútu eftir glæsilegt skot rétt fyrir utan teig. Þar var að verki Olivia Schough.

Jón Þór ætlaði sér að setja meiri pressu á sænska liðið og nýtti skiptingar sínar tímalega. Fyrsta skipting leiksins var á 62. mínútu. Berglind Björg Þorvaldsdóttir kom inn á fyrir Hlín Eiríksdóttur. Hólmfríður Magnúsdóttir og Agla María Albertsdóttir komu einnig inn á af bekknum.

Skiptingarnar hleyptu smá lífi í sóknarleik Íslenska liðsins. Þær dugðu þó ekki til. Íslenska liðinu tókst ekki að skora og niðurstaðan var 2-0 tap.

Svíar eru í góðri stöðu með 19 stig á toppi riðilsins. Þær eiga eftir að spila einn leik. Ísland er í öðru sæti með 13 stig. Íslenska liðið á hins vegar tvo leiki eftir.

Næsti leikur Íslands í riðlinum er þann 26. nóvember. Þá heimsækja þær Slóvakíu. Síðasti leikur liðsins verður þann 1. desember á móti Ungverjalandi.