Kristinn Jakobsson, einn fremsti knattspyrnudómari sem Ísland hefur átt, var gestur í hlaðvarpsþættinum Dr. Football í dag í umsjón Hjörvars Hafliðasonar.
Þar var Kristinn á meðal annars spurður út í atvik sem átti sér stað í gær í leik Liverpool og Manchester United.
Í fyrri hálfleik var mark dæmt af Liverpool en það eru ekki allir sammála um hvort VAR hafi dæmt það rétt eða ekki.
Kristinn ræddi þetta atvik við Hjörvar í dag og segir að VAR hafi tekið rétta ákvörðun með dómaranum Craig Pawson.
Brotið var á David de Gea innan teigs áður en Roberto Firmino skoraði en það kom ekki að sök að lokum og vann Liverpool 2-0 sigur.
,,Ég held að þetta hafi klárlega verið rétt hjá þeim. Þegar De Gea er að fara upp í boltann til að grípa og handsama knöttinn með eðlilegum hætti þá finnst mér eins og það sé farið í hann áður en hann snertir knöttinn og þar af leiðandi nær hann ekki að handsama knöttinn með eðlilegum hætti,“ sagði Kristinn.
,,Það var rétt að dæma á þetta og mér fannst svolítið sérstakt að dómarinn hafi ekki tekið ákvörðun sjálfur frekar en VARið.“
,,Ef Pawson hefði ekki haft hjálp þá hefði hann tekið ákvörðun um að dæma á þetta því mér fannst brotið vera það augljóst.“