Tony Adams fyrrum fyrirliði Arsenal efast um að Bernd Leno sé nógu góður markvörður svo að Arsenal geti gert atlögu að efstu sætunum í deildinni. Adams segist efast um þá ákvörðun Mikel Arteta að selja Emiliano Martinez til Aston Villa.
Arsenal seldi Martinez til Aston Villa og keypti Rúnar Alex Rúnarsson til að veita Leno samkeppni í marki liðsins.
„Martinez var magnaður í bikarnum á síðustu leiktíð, alveg frábær. Ég kunni vel við hann, hann er góður í því sem Leno er lélegur í. Það eru fyrirgjafir og þannig hlutir,“ sagði Adams.
„Arteta hefur sett allt sitt traust á Leno en í mínum bókum er hann ekki nógu góður fyrir lið sem ætlar sér eitt af fjórum efstu sætunum.“
Rúnar Alex var á varamannabekk Arsenal í gær þegar liðið tapaði 3-1 gegn Liverpool á Anfield. „Martinez var með sjálfstraust og allt féll með Arsenal þegar hann stóð í markinu.“
Rúnar Alex gæti þreytt frumraun sína með Arsenal á fimmtudag þegar liðið fer aftur í heimsókn til Liverpool en nú í deildarbikarnum.
