Barcelona hefur tilkynnt að upp hafi komið kórónuveirusmit í liðinu. Barcelona á að keppa við Bayern Munchen á föstudaginn í 8-liða úrslitum Meistaradeildarinnar. The Sun greinir frá.

Ekki er búið að segja frá því hvaða leikmaður það er sem greindist með Covid-19 en líklega er það ekki meðlimur í aðalliðinu. „Leikmaðurinn er ekki með nein einkenni, er við góða heilsu og er í einangrun heima hjá sér,“ segir í tilkynningu Barcelona sem hefur tilkynnt málið til heilbrigðisyfirvalda. „Allir sem hafa verið með leikmanninum hafa verið raknir og látnir fara í skimun. Þá var leikmaðurinn ekki að neinu leyti með aðalliðinu sem á að keppa í Lisbon á föstudaginn.“

Í gær greindi franska liðið PSG einnig frá því að leikmaður í þeirra röðum væri með Covid-19. Sá leikmaður var einnig settur í einangrun. Hann var þó ekki hluti af liðinu sem var nú þegar komið til Lisbon en PSG spilar þar við ítalska liðið Atalanta í kvöld.