Helgi Valur Danielsson miðjumaður Fylkis hefur líklega spilað sinn síðasta leik á ferlinum. Hann brotnaði illa á fæti í leik Fylkis gegn Gróttu í efstu deild karla í knattspyrnu í gær.
Helgi er 38 ára gamall og hefur átt frábæran feril en meiðslin binda líklega enda á feril hans.
„Ég er fjórbrotinn, semsagt tvöfalt brot á báðum beinum og alveg í sundur. Ég er samt sem áður furðugóður miðað við allt saman og vil núna bara drífa þessa aðgerð af og klára þetta,“ sagði Helgi Valur við mbl.is í dag.
„Það er miklar líkur á því að þetta hafi verið síðasti leikurinn já. Ég er ekki að svekkja mig of mikið á þessu núna.“
Ljóst er að þessi tíðindi koma á slæmum tíma fyrir Fylki, félagaskiptaglugginn lokar í dag og Helgi Valur liðinu afar mikilvægur.