COVID-19 veiran er byrjuð að koma sér fyrir aftur í íslensku samfélagi en fjögur staðfest smit komu upp í síðustu viku og um helgina hjá Íslendingum.

Þrjú þessari tilfella tengjast íslenskum knattspyrnuheimi en tvær konur og einn karl hafa greinst með veiruna.

Fyrsta tilfellið sem kom upp var hjá leikmanni Breiðabliks. Hún kom til landsins 17. júní sl. og reyndist sýnataka á landamærum neikvæð. Síðar kom í ljós að hún hafði verið í nánd við smitaðan einstakling erlendis og fór því aftur í sýnatöku. Sú sýnataka reyndist jákvæð.

Margrét Gauja Magnúsdóttir fyrrverandi bæjarfulltrúi skrifar þessari stúlku kveðju á Facebook um helgina. Margrét þekkir veiruna vel eftir að hafa glímt við hana í vetur, Margrét fékk mjög slæm einkenni af veirunni.

„Elsku þú, kæri leikmaður Breiðabliks! Þetta er ekki þér að kenna,“ skrifar Margrét Gauja í pistli sínum.

Leikmaðurinn bað um að fara í annað próf og Margrét hrósar henni fyrir það „Þú átt þakkir fyrir að stíga fram og biðja um annað test. Mér finnst þú hugrökk og töff pía.Vonandi færðu vægu útgáfuna en farðu vel með þig, hann er óútreiknanlegur þessi vírus.“