Kári Árnason sem hefur átt fast sæti í íslenska landsliðinu síðustu ár gerir upp ferill sinn í Draumaliðinu hjá Jóa Skúla.
Kári velur draumalið sitt af ferlinum en hann ræðir einnig um ferilinn í heild. Hann ræðir um Heimsmeistaramótið 2018 þar sem Ísland var með í fyrsta sinn.
Ísland fór ekki upp úr riðli sínum og Kári telur að mistök hafi verið gerð fyrir mót og í leiknum á móti Nígeríu.
„Það eru hlutir sem maður pirrar á sig taktískt, Gylfi og Aron voru tæpir. Báðir búnir að vera meiddir og ekki í sínu besta formi, við spilum með fjögurra manna miðju gegn gríðarlega líkamlega sterku liði Nígeríu, þeir voru í góði formi. Ég veit ekki hvort að það sé vanmat, eigum við að keyra yfir Nígeríu?,“ sagði Kári í samtali við Jóhann Skúla
Ísland hafði spilað með þriggja manna miðju gegn Argentínu en Emil Hallfreðsson var settur á bekkinn gegn Nígeríu, mistök að mati Kára.
„Við vorum að spila á móti alvöru íþróttamönnum, það gekk vel í fyrri hálfleik en í þeim síðari þá bara erum við sprungnir. Þetta tekur rosalega á að spila svona, alltaf á móti þremur miðjumönnum. Það opnast allt.“
Kári telur að Heimir Hallgrímsson hafi gert mistök með því að velja ekki Kolbein Sigþórsson sem hafði ekkert spilað með félagsliði. Hann hefði sjálfur valið Kolbein frekar en Albert Guðmundsson sem þá var í varaliði PSV í Hollandi.
Albert lék síðustu mínúturnar gegn Króatíu þegar Ísland féll úr leik. „Svo hefði maður viljað sjá Kolla, þó það hafi ekki verið nema síðustu fimm mínúturnar á móti Króatíu. Þú ert með Albert sem er kjúklingur og hafði aldrei spilað neitt, var í varaliði PSV á þeim tíma. Frábær fótboltamaður en var ekkert klár í þetta, fyrstu alvöru leikirnir hans eru á HM. Sama hversu góður hann á eftir að vera, þá er Kolli maðurinn í þetta. Ég hefði alltaf takið Kolla með.“
