Gary Neville, sérfræðingur Sky Sports segir fólki á Englandi að gleyma þeirri hugmynd að leikir fari fram í apríl eða maí.
Neville er öruggur á því að enginn fótbolti verði spilaður á Englandi fyrr en eftir þrjá eða fjóra mánuði. Sá það raunin, er líklegt að deildarkeppnir þar í landi klárist ekki og að mótið verði blásið af.
,,Fótboltinn snýr ekki aftur, allt það sem þarf til að hafa fótboltaleik verður ekki til staðar. Það þarf lögreglufólk og sjúkrabíla, þeir verða ekki í boði næstu mánuðina,“ sagði Neville sem hefur áhyggjur af útbreiðslu kórónuveirunnar þar í landi.
,,Þetta fólk verður á sjúkrahúsum, að hjálpa fólki sem veikist.“
,,Heilsan kemur fyrst, það á líka við um fólk sem mætir á völlinn og leikmennina. Það verður enginn fótbolti næstu 3-4 mánuðina.“