Jurgen Klopp, stjóri Liverpool segir fólki sem pirrar sig á því að enginn fótbolti sé spilaður þessa dagana, að slaka á. Um sé að ræða leik sem er lítið merkilegur þegar lífshættuleg veira herjar á heiminn.

Kórónuveiran hefur orðið til þess að allar deildir í Evrópu eru nánast komnar í frí, óvíst er hvenær leikar hefjast á ný.

Liverpool er svo gott sem búið að vinna ensku úrvalsdeildina, liðið þarf að bíða í einhvern tíma til að geta unnið hana í fyrsta sinn í 30 ár.

,,Þetta er fótbolti, þetta er bara leikur. Þetta er ekki mjög alvarlegt, þetta er bara leikur,“ sagði Klopp.

,,Það eru mikilvægari hlutir í lífinu en leikurinn okkar, reynið að njóta lífsins á meðan.“

Klopp var spurður að því hvers vegna hann væri svona auðmjúkur. ,,Það eiga allir að sýna auðmýkt, af hverju ekki?,“ sagði Klopp.

,,Af hverju átt þú að vera eitthvað merkilegri en næsti maður, leikmenn okkar lifa sérstöku lífi, Þeir fá fullt af peningum en þeir geta ekki verið á meðal almennings.“