Daníel Hafsteinsson, hefur skrifað undir hjá FH og mun ganga í raðir félagsins á láni frá Helsingborg í Svíþjóð. Þetta herma öruggar heimildir 433.is.
Helsingborg hefur staðfest að Daníel sé á förum á láni, hann kaus að fara í FH. Hann mætir á sína fyrstu æfingu í Kaplakrika á morgun.
Sænska félagið keypti þennan öfluga miðjumann síðasta sumar frá KA, hann hefur hins vegar ekki náð að festa sig í sessi.
Valur sem vildi fá Daníel síðasta sumar vildi ekki fá Daníel í sínar raðir núna, samkvæmt heimildum 433.is. Þá ku Stjarnan hafa reynt að fá Daníel að láni en hann kaus að fara í FH.
Daníel er fæddur árið 1999 og fagnar 21 árs afmæli sínu í lok þessa árs, hann hefur spilað fyrir yngri landslið Íslands og ætti að styrkja FH töluvert.
