Ryan Inniss er ekki nafn sem margir kannast við en hann er leikmaður Crystal Palace í ensku úrvalsdeildinni.
Inniss er þó ekki nógu góður fyrir aðallið Palace og spilar með Newport County á láni þessa stundina.
Inniss hefur nú verið dæmdur í þriggja leikja bann fyrir að bíta andstæðing í leik gegn varaliði West Ham.
Leikurinn var í EFL bikarnum á Englandi en þessi 24 ára gamli leikmaður fékk beint rautt spjald á 88. mínútu.
Ungur leikmaður West Ham, Reece Hannam, sýndi dómaranum það að Inniss hafi bitið sig í hita leiksins.
Inniss gæti átt yfir höfði sér lengra bann en hann hefur verið ákærður af enska knattspyrnusambandinu.