Það hafa verið háværar sögusagnir í gangi um þjálfarastöðuna í græna hluta Kópavogs, margir eru orðaðir við starfið sem Ágúst Gylfason hefur nú. Ágúst er að klára annað ár sitt í starfi en gæti fengið rauða spjaldið í lok þess. Blikar hafa tryggt sér Evrópusæti í Pepsi Max-deildinni í ár.

Heimir Guðjónsson, Óskar Hrafn Þorvaldsson og Ólafur Jóhannesson eru allir nefndir til sögunnar, sem þjálfari Blika á næstu leiktíð.

Ágúst hefur tryggt Blikum Evrópusæti annað árið í röð, það hefur ekki gerst í Breiðablik síðan 2013.

Liðið náði þá Evrópusæti 2012 og 2013. Það var þá í annað sinn í sögu félagsins sem Breiðablik tók Evrópusæti tvö ár í röð. Hitt skiptið var 2009 og 2010, þá urðu Blikar bikar og Íslandsmeistarar. Sem eru einu titlarnir í sögu félagsins.

Að tryggja Evrópusæti, tryggir fjármagn fyrir Breiðablik og Ágúst hefur því góð spil á hendi þegar fundað verður um framtíð hans.

Ágúst hefur svarað fyrir þessar sögusagnir, hann veit af þeim. ,,Ég les stundum fjölmiðlana líka og les Fótbolta.net og 433.is og ég hef orðið var við það en ég er ánægður í Breiðablik og við sjáum svo hvað setur. Miðað við árangurinn sem við erum að setja þá er ég bara sáttur. Ég er með samning áfram en við erum með klásúlu í samning í báðar áttir þannig við klárum þetta season og tökum stöðuna hvort menn séu ekki sáttir,“ sagði Ágúst í lok ágúst.

Pepsi Max deildin á 433 er í boði