Jóhannes Karl Guðjónsson, þjálfari ÍA var svekktur eftir 1-0 tap gegn FH í Pepsi Max-deild karla í kvöld.
Sigurmark FH kom seint í leiknum en Skagamenn voru sterkari aðili framan af.
,,Steven Lennon, var það sem skipti máli. Þeir voru heppnir hvernig boltinn datt með honum, gríðarlega svekktur að fá ekkert úr þessum leik. Við vorum frábærir,“ sagði Jóhannes Karl við Stöð2 Sport eftir leik.
,,FH skapaði sér ekki neitt, boltinn datt fyrir Lennon. Við fengum 3-4 dauðafæri, þar sem við náum ekki að koma boltanum yfir línuna. Ef allt hefði verið eðlilegt hefðum við verið með forystu í hálfleik.“
Jóhannes Karl vildi fá tvær vítaspyrnur í leiknum, þá fyrri í fyrri hálfleik og svo seint í leiknum.
,,FH vörðu með hendi á fjær, dómarinn segist ekki hafa séð það. Dómari sem á að staðsetja sig nokkuð nálægt, í seinni hálfleik gerir Brynjar stóra tilraun til að stoppa skot með olnboga. Setur hendina út, ég er ósáttur með það. Ég held að dómarinn hafi séð það en ekki þorað að dæma.“