,,Heimir Guðjónsson verður þjálfari Vals árið 2020,“ sagði Tómas Þór Þórðarson, ritstjóri enska boltans á Símanum, í hlaðvarpsþætti Fótbolta.net.
Heimir er sagður á heimleið í október þegar tímabil hans með HB í Færeyjum er á enda, Heimir er að klára sitt annað tímabil þar í landi. Heimir er einn sigursælasti þjálfari íslenska fótboltans.
Tvö ár eru síðan að Heimir var rekinn frá FH en hjá Val er Ólafur Jóhannesson í brúnni, Heimir tók við FH af Ólafi fyrir tól árum. Heimir er orðaður við Val, Breiðablik, Stjörnuna og KA þessa dagana.
,,Það er mín spá að Heimir þjálfi Val,“ sagði Tómas og Elvar Geir Magnússon, ritstjóri Fótbolta.net benti á að samningur Ólafs við Val væri á enda eftir tímabilið. Valur hefur verið í veseni í ár eftir fjögur frábær ár þar á undan.
,,Ég heyrði í vikunni að Heimir væri maðurinn sem Valur vildi fá, ef þeir taka hann ekki núna hvenær þá?,“ sagði Tómas.