Goðsögnin Hermann Hreiðarsson er í viðræðum við enska félagið Macclesfield þessa stundina samkvæmt heimildum 433.is.
Hermann lagði skóna á hilluna árið 2014 en hefur síðan þá tekið að sér nokkur þjálfarastörf.
Hann var síðast hjá liði Kerala Blasters í Indlandi og starfaði við hlið David James en þeir voru samherjar hjá Portsmouth sem og ÍBV.
Hermann þekkir stjóra Macclesfield vel en þar er Sol Campbell við stjórnvölin. Þeir léku einnig saman hjá Portsmouth.
Macclesfield hefur verið í fréttunum undanfarið en félagið er í miklum fjárhagsvandræðum og hafa leikmenn kvartað yfir því að fá ekki greidd laun.
Campbell tók sjálfur við liðinu á síðasta tímabili og tókst að bjarga liðinu frá falli.
Campbell er fyrrum enskur landsliðsmaður og ku hafa áhuga á því að vinna með Hermanni næsta vetur.
Hermann er 44 ára gamall í dag en hann hefur þjálfað karla og kvennalið Fylkis og var aðalþjálfari ÍBV sumarið 2013.