Breiðablik vann gríðarlega sterkan sigur í Pepsi Max-deild karla í kvöld er liðið mætti Stjörnunni í Garðabænum.
Eftir að hafa lent 1-0 undir þá sneru Blikarnir leiknum sér í vil og unnu 3-1 sigur.
Aron Bjarnason, Guðjón Pétur Lýðsson og Alexander Helgi Sigurðarson skoruðu mörkin fyrir þá grænu í endurkomunni.
Hér má sjá það góða og slæma úr leiknum.
Plús:
Svar Blika við marki Stjörnunnar var geggjað. Það var bara eitt lið á vellinum eftir að Ævar Ingi hafði komið heimamönnum yfir.
Aron Bjarnason var stórkostlegur eftir að hafa komið inná. Það kom á óvart að hann væri á bekknum í kvöld en hann tók yfir leikinn eftir að hafa komið við sögu í seinni hálfleik. Stjörnumenn réðu ekkert við hann. Þetta var besta skipting sumarsins.
Fyrstu tvö mörk Blika voru STÓRKOSTLEG. Það fyrra skoraði Aron með geggjuðu skoti fyrir utan teig og það seinna gerði Guðjón Pétur Lýðsson beint úr aukaspyrnu.
Þrátt fyrir að vera 2-1 yfir þá voru Blikar enn hættulegra liðið. Stjörnumenn virtust bara vera alveg búnir á því og gestirnir nýttu sér það.
Mínus:
Það var eins og allt líf færi úr Stjörnunni eftir markið sem kom þeim yfir. Féllu langt til baka og ógnuðu ekki neitt.
Miðja liðsins var heilt yfir slök og voru Blikar í litlum vandræðum með að spila sig í gegn eða sækja hratt.
Útlitið er bara alls ekkert gott í Garðabænum. Stjarnan er í sjöunda sæti deildarinnar, sjö stigum á efti Blikum sem eru á toppnum.
Hvar er þessi baráttuandi í Stjörnuliðinu? Maður verður að spyrja sig hvort Rúnar Páll sé búinn að ná að kreista allt mögulegt úr þessu liði.
Þeir virtust bara gefast upp. Það á ekki að vera svona mikill munur á liðunum en Breiðablik átti sigurinn klárlega skilið.