Kjartan Henry Finnbogason framherji Vejle og landsliðsmaður íslands minnist bróður síns, Hallgríms Þormarssonar sem féll frá á dögunum í viðtali við Morgunblaðið í dag. Kjartan skoraði fyrir Vejla skömmu eftir fráfall Hallgríms og tileinkaði honum markið.
Hallgrímur féll frá í blóma lífsins en Kjartan segir að erfið augnablik muni koma á næstunni þar sem minningar um Hallgrím munu hellast yfir hann.
„Það hefur verið mjög erfitt og ég hugsa að ég sé ekki alveg búinn að gera mér grein fyrir þessu enn þá. Það er frekar stutt síðan þetta gerðist og þetta var auðvitað mikið áfall. Það koma jól og afmælisdagar sem verða erfiðir. Þetta er reynsla sem ég óska engum. Ég og fjölskyldan munum reyna að vera þéttari saman og hugsa vel um hvert annað,“ sagði Kjartan við Morgunblaðið.
Kjartan skoraði sex dögum síðar í dönsku 1. deildinni og fékk innilegt faðmlag frá liðsfélögum sínum.
„Mamma hringdi í mig daginn sem þetta gerðist og ég tók þá ákvörðun að vera áfram úti og klára einn leik áður en ég færi heim í jarðarförina. Ég skoraði í þessum leik og ég mun reyna að halda mínu striki. Ég get hins vegar ekki verið viss hvernig áhrif þetta mun hafa á mig. Ég á góða að og maður verður að líta fram á veginn. Maður fær ekkert val þegar svona slys verða,“ sagði Kjartan Henry.