FC Bayern hefur áhuga á að ráða Mauricio Pochettino til starfa sem næsta þjálfara félagsins, ekki er líklegt að félagið geri neitt fyrr en í sumar.

Niko Kovac var rekinn úr starfi á dögunum en Hans-Dieter Flick stýrir liðinu þessa stundina. Pochettino var rekinn úr starfi hjá Tottenham á þriðjudag eftir fimm og hálft ár í starfi.

Pochettino er frá Argentínu en honum hefur vegnað vel á Englandi, ljóst er að mörg félög munu reyna að krækja í Pochettino.

Pochettino var rekinn á þriðjudag, sama dag og leikmenn voru í fríi. Honum var gert að hreinsa sitt dót af æfingasvæðinu og mæta ekki aftur.

Hann fékk því ekki að kveðja leikmennina sem hann eyddi miklum tíma með. ,,Því miður getum ekki komið og sagt bless, þið verðið allir í hjarta okkar,“ stóð á miða í klefanum hjá leikmönnum Tottenham. Undir bréfið skrifuðu Pochettino og hans aðstoðarmenn, sem voru allir reknir.