Íslenska karlalandsliðið í fótbolta hefur undirbúning sinn fyrir landsleikina gegn Tyrklandi og Moldóvu i dag. Leikmenn liðsins hafa komið til Antalya um helgina en von er á síðustu mönnum í dag.

Liðið æfir í Antalya í dag og á morgun og heldur svo til Istanbúl á miðvikudag, þar sem leikurinn fer fram.

Ísland er fjórum stigum á eftir Tyrklandi sem er í öðru sæti riðilsins. Ísland þarf að vinna Tyrkland og Moldóvu og treysta á að Andorra taki stig gegn Tyrkjum í síðustu umferð. Miði er möguleiki en íslenska liðið er án tveggja lykilmanna, Aron Einar Gunnarsson og Jóhann Berg Guðmundsson eru meiddir.

Þeir félagar sitja þó ekki auðum höndum, Jóhann Berg sem leikur með Burnley á Englandi er mættur til Katar þar sem Aron Einar býr. Aron gekk í raðir Al-Arabi í sumar og æfa Jóhann og hann saman í dag.

Þeir eru staddir í Aspetar, sem er afar vinsæll staður á meðal íþróttafólks sem er að koma sér á lappir aftur eftir meiðsli.

Jóhann birtir mynd af Aroni á hlaupabretti en hann meiddist illa á ökkla á dögunum, Jóhann er svo að jafna sig eftir að hafa tognað aftan í læri.