Kristinn Kjærnested, fráfarandi formaður knattspyrnudeildar KR, er að hætta eftir tuttugu ára stjórnarsetu. Óhætt er að segja að Kristinn hafi lifað tímanna tvenna í Vesturbænum og gengið í gegnum súrt og sætt eins og gengur og gerist á löngum ferli.
Kristinn er í ítarlegu viðtali við Fréttablaðið í dag þar sem hann ræðir tímann sem formaður knattspyrnudeildar KR. KR liðið hefur verið sigursælt undanfarin ár, en á þeim tuttugu árum sem hann var í stjórn KR – og rúm 10 ár sem formaður – varð karlaliðið 7 sinnum Íslandsmeistari og 5 sinnum bikarmeistari. Kristinn segir að eitt hafi verið sérstaklega sárt á öllum þessum árum.
„Ég tók það inn á mig þegar stelpurnar okkar féllu hér um árið. Það var sárt. Maður hefur eiginlega verið viðkvæmastur fyrir umræðunni um stelpurnar – að við séum ekki að gera nóg. Þar erum við að gera okkar besta. Skoðanir á því sem við erum að gera eru alltaf miklar og það verður alltaf þannig í KR. Það hafa allir rétt á sinni skoðun. En þessir frábæru einstaklingar sem hafa verið og eru áfram hafa alltaf sett KR í fyrsta sætið – ég fullyrði það.“