Það vakti athygli í síðasta mánuði þegar Jóhann Berg Guðmundsson, kantmaður íslenska landsliðsins gagnrýndi fréttamenn Vísis. Það gerði Jóhann eftir tap Ísland gegn Albaníu, í undankeppni EM.

Jóhann var fjarverandi vegna meiðsla en horfði á leikinn heima hjá sér í Englandi, hann var ekki sáttur með blaðamenn Vísis. Þar var sagt eftir leik að spilamennska liðsins væri þannig að ekki væri hvetjandi fyrir íslenska áhorfendur að mæta á völlinn.

Íslenska þjóðin er ekki á sama máli og er uppselt gegn Frökkum á morgun og þétt setinn bekkur verður gegn Andorra á mánudag.

,,Þvílíka þvælu commentið hjá þessum ágætu frèttamönnum hjá @visir_is eftir ein slæm úrslit. Rífa sig í gang takk!,“ skrifaði Jóhann en útskýrði ummælin nánar við Vísi í gær.

„Mér fannst það svolítið skrýtið því einmitt þegar okkur illa gengur er það fólkið í stúkunni sem þarf að rífa okkur áfram,“ sagði Jóhann við Vísi þegar hann útskýrði ummmæli sín.

„Við vitum að leikurinn í Albaníu var ekki nógu góður og við höfum farið yfir það. Þið fréttamenn fenguð líka smjörþefinn af því frá Erik hvernig þetta var allt saman. En þegar það kemur léleg frammistaða eins og þetta var þá þurfum við stuðning fólksins til að rífa okkur í gang aftur.“

Þvílíka þvælu commentið hjá þessum ágætu frèttamönnum hjá @visir_is eftir ein slæm úrslit. Rífa sig í gang takk! pic.twitter.com/8Wq7bw5HFH

— Johann B Gudmundsson (@Gudmundsson7) September 10, 2019