Breiðablik er í viðræðum við þjálfara um að taka við karlaliði félagsins, eins og fram hefur komið ræða Blikar við Óskar Hrafn Þorvaldsson, þjálfara Gróttu.
Talið er að Óskar Hrafn taki við Blikum á allra næstu dögum, hann hefur unnið magnað starf með Gróttu en tekur skrefið nú í næsta besta lið landsins, síðustu tveggja ára.
,,Það eru viðræður í gangi, þetta fer vonandi að taka á sig mynd,“ sagði Eysteinn Pétur Lárusson, framkvæmdarstjóri Breiðabliks við 433.is í dag en vildi lítið annað gefa upp.
Óskar Hrafn kom Gróttu upp í Pepsi Max-deildina í haust, hann kom liðinu upp úr 2. deildinni fyrir rúmu ári. Magnaður árangur í hans fyrsta starfi í meistaraflokki.
Breiðablik rak Ágúst Gylfason úr starfi áður en tímabilið var á enda, þá höfðu sögur um Óskar Hrafn heyrst í fleiri vikur. Óskar Hrafn kom til landsins frá Tenerife í þessari viku og búast má við niðurstöðu í málið á allra næstu dögum.
,,Ég vil ekkert tjá mig, að svo stöddu. Fólk er að tala saman, ekkert meira um það segja,“ sagði Birgir Tjörvi Pétursson, formaður knattspyrnudeildar Gróttu við 433.is.
