Logi Tómasson, var öflugur í liði Víkings þegar liðið varð bikarmeistari á laugardag. Logi byrjaði leikinn í fjarveru Dofra Snorrasonar og komst vel frá sínu. Víkingur vann þá sigur á FH í úrslitaleik.
Logi er einnig liðtækur rappari og er þekktur undir nafninu, Luigi. Það hefur vakið umræðu í sumar, margir hafa efast um hvar einbeiting Loga sé. Hann gaf sem dæmi út plötu á miðju tímabili.
,,Mjög, laugardagurinn var slæmur dagur fyrir my haters. Þeir hafa verið í gröfinni, lengst niðri,“ sagði Logi í Brennslunni á FM957 í dag.
Það hefur verið rætt mikið um það í sumar að Logi ætti að einbeita sér meira að fótboltanum. ,,Ég hlusta á Dr. Football, þeir sögðu að ég væri ekki með neinn fókus. Væri bara í hljóðveri fram á nótt, þeir voru að segja að ég væri ekki með neina einbeitingu. Það pirraði mig, ég er bara að einbeita mér að fótboltanum.“
Logi segist hafa fengið að vita það fyrir leik að FH-ingar ætluðu að keyra á hann, það hafi verið rætt um það á fundi FH-inga. ,,Ég vissi líka fyrir leik að FH-ingar ætluðu að sækja á mig, þeir töluðu um það á fundi. Það kveikti í mér, ég skildi ekki FH-inga. Það var enginn kraftur, þeir spörkuðu bara í okkur. Fengu heimskuleg spjöld. Mér fannst þetta rautt spjald á Pétur, hann hlýtur að geta sett fótinn annars staðar niður.“
Víkingar fögnuðu vel eftir leik, einn kaldur í klefanum og svo full keyrsla.
,,Fyrsti bjórinn beint inn í klefa, ég held að þetta sé besti dagur lífs míns. Við fórum út að borða, allt liðið. Svo fórum við niður í Víkina, þetta voru örugglega þúsund manns. Ég er búinn að ná mér niður.“
Þegar Logi var spurður hvort hann hefði endað kvöldið á B5. ,,Við Biffuðum okkur upp.“
Logi var svo beðinn um að segja frá Arnari Gunnlaugssyni, þjálfara Víkings. ,,Böllur, nettur og meistari.“
