Hörður Snævar Jónsson skrifar frá Elbasan:
Kolbeinn Sigþórsson skoraði annað mark Íslands í kvöld sem spilaði við Albaníu í undankeppni EM.
Kolbeinn er einu marki frá markameti Eiðs Smára Guðjohnsen en hann jafnaði metin í 2-2 í Albaníu í kvöld.
Því miður dugði það ekki til en Albanía vann 4-2 sigur og var frammistaðan ekki nógu góð að sögn Kolbeins.
,,Þetta eru svakaleg vonbrigði. Þegar þú færð á þig fjögur mörk þá er erfitt að vinna fótboltaleiki,“ sagði Kolbeinn.
,,Þetta var ekki í heildina góður leikur. Við vorum á eftir í öllum aðgerðum og það var mikið pláss á milli sóknar, miðju og varnar og sérstaklega í fyrri hálfleik.“
,,Svo í endann reynum við að skora til að jafna en þá gáfum við mörk og þetta gekk ekki upp.“
,,Við vorum hættulegir í seinni hálfleik og vorum með leikinn í höndunum, sérstaklega er við jöfnum í bæði skiptin.“
,,Vanalega þegar við komum til baka þá höldum við því en það gerðist ekki í dag og þriðja markið var óheppnismark. Fór í hendina á Kára og inn.“
,,Ég var klár og það var ekkert að mér, ég var auðvitað tilbúinn að byrja en svona var uppleggið. Í stöðunni 1-1 eða 2-2 var þetta í lagi en við klárum leikinn ekki nógu vel.“
,,Við hleypum þeim á milli okkar í aftasta fjórðung og þeir ná skoti á markið sem fer í Kára, þetta getur fallið hvar sem er og þetta féll ekki með okkur.“
,,Það er frábært fyrir mig að finna að ég sé að komast í stand og að finna markaskóna á ný. Þetta er að smella fyrir mig sem er það sem ég vonaðist eftir. Það er svekkjandi að það hafi ekki virkað að halda þessu í 2-2.“
