Albert Guðmundsson var gestur í hlaðvarpsþætti 433.is í gær en hann birtist á öllum helstu veitum.

Albert fór yfir feril sinn til þessa með félagsliðum og landsliði en hann spilar með AZ Alkmaar í dag.

Hann var þó áður hjá PSV Eindhoven og vann með goðsögnum hjá félaginu á borð við Ruud van Nistrelrooy og Marc van Bommel.

Albert segir sögu af því þegar hann reifst við Van Bommel fyrstu vikuna hjá félaginu áður en sambandið batnaði.

,,Van Nistelrooy var mikið með okkur sóknarmennina en ég og Van Bommel náðum vel saman,“ sagði Albert.

,,Við lentum þvílíkt upp á kant fyrstu vikuna hjá PSV. Hann var að hjálpa U19 og við áttum að spila leik við Manchester í Meistaradeildinni. Við lentum upp á kant því ég átti að vera í einhverjum vegg sem ég var ekki í.“

,,Við fórum að rífast á videofundi því ég var ekki í veggnum en það var markmaðurinn sem sendi mig úr veggnum sem hann vissi ekki og það kom svo í ljós.“

,,Við tókumst í hendur og allt varð gott eftir það. Eftir það varð allt gott og hann var virkur í að hjálpa mér og að segja mér hvað ég gæti gert og bætt og svona. Ég á mikið honum að þakka.“