Háskólaprófssorinn umdeildi Hannes Hólmsteinn Gissurarson hjólar í Cristiano Ronaldo á Facebook-síðu sinni. Hann gagnrýnir leikmann Juventus þó ekki fyrir neitt tengt spilamennsku hans heldur að hann hafi áhyggjur af Amazon-regnskóginum. Hannes hefur í seinni tíð færst sífellt lengra í afneitun á hamfarahlýnun.

„Knattspyrnukappinn Cristiano Ronaldo (sá, sem tók velgengni íslenska liðsins sem verst um árið) endurtók þá röngu tölu, að Amasónskógur framleiddi meira en 20% af súrefni jarðar. (Hann eyðir sennilega jafnmiklu og hann framleiðir.),“ skrifar Hannes.

Hann nýtir svo tækifærið og hjólar í sinn eigin vinnustað, Háskóla Íslands. „Ronaldo birti með færslu sinni á Instagram mynd frá 2013. En ég vissi ekki fyrir, að Vísindavefur Háskólans væri jafnilla að sér og kappinn fótafimi,“ skrifar Hannes

Forsetaframbjóðandinn og rithöfundurinn Andri Snær Magnason skýtur á Hannes í athugasemd. „Það er svo skemmtilegt hvað náttúrusýn þín minnir á ævintýri sem kom út árið 1930: ,,Ef þú lítur út um vagnglugga í járnbrautarlest og sérð aðeins ógróið land, skóga og mýrar má segja að þú sjáir alls ekki neitt. Ógróið land er leir, sandur og grjót. Skógar eru bjálkar, sperrur og þil. Mómýrar eru rafmagn. Úr leir og sandi gerum við tígulstein, úr leiri og kalki sement, úr járngrýti stál.““