Arnar Þór Viðarsson, yfirmaður knattspyrnumála hjá KSÍ, fékk senda væna pillu á Twitter í kvöld.

Samúel Samúelsson tjáði sig um Arnar sem ræddi við Fótbolta.net á dögunum og var gestur í útvarpsþætti miðilsins.

Samúel er formaður Vestra sem leikur í 2.deild karla og hjá liðinu er leikmaðurinn Þórður Gunnar Hafþórsson.

Þórður er afar efnilegur leikmaður en hann er einnig hluti af U19 landsliði Íslands og þekkir Arnar vel til hans vegna þess.

Arnar gaf það út að það væri hentugt fyrir Þórð að semja við annað lið ef hann vildi taka frekari framförum sem knattspyrnumaður.

Samúel heyrði þessi ummæli Arnars og var allt annað en sáttur. Hann skrifaði í kjölfarið yfirlýsingu á Twitter.

,,Finnst ummælin sem yfirmaður knattspyrnumála hjá KSÍ lét út úr sér alveg fáránleg. Hann segir að leikmaður okkar verði að fara frá félaginu ætli hann að taka meiri framförum og að hann staðni sem leikmaður ef hann verður um kyrrt,“ skrifar Samúel.

,,Fullyrðing sem mér finnst helvíti hörð og óábyrgt að henda fram, viðkomandi leikmaður hefur spilað 62 meistaraflokks leiki, meira en nokkur annar í þessum U19 hóp. Er hann betur settur á bekknum eða í 2. flokki hjá Val eða FH?“

,,Tekur hann meiri framförum þar en að spila með liði sem er að berjast um sæti í Inkasso-deildinni? Þýðir það að ungir leikmenn í litlum klúbbum eins og Selfossi, Gróttu og Leikni eigi að leita í KR og Breiðablik?“

Samúel heldur áfram og tekur Daða Frey, markvörð FH sem dæmi sem spilar alla leiki liðsins í dag. Samúel viðurkennir að leikmenn þurfi að yfirgefa sín uppeldislið á einhverjum tímapunkti en segir ummæli Arnars vera út í hött.

,,Væri Daði Freyr í markinu hjá FH ef hann hefði bara spilað í 2. flokki? Flestir góðir leikmenn yfirgefa uppeldisfélagið á einhverjum tímapunkti til að spila á leveli við hæfi en að yfirgefa liðið sitt til að staðna ekki sem leikmaður finnst mér fráleitt!“

,,Ætla rétt að vona að Arnar Þór Viðarsson hafi eitthvað meira fram að færa en þessa djöfulsins vitleysu.“

Fáránlegt ! @footballiceland að yfirmaður knattspyrnumaðumala hendi þessu fram ! pic.twitter.com/cOGXbUzX0k

— Samúel Samúelsson (@SSamelsson) 26 August 2019