Ágúst Gylfason, þjálfari Breiðabliks, ræddi við fjölmiðla í kvöld eftir frábæran 4-2 sigur á FH í efstu deild.

Ágúst var spurður um nokkra hluti og þar á meðal Anton Ara Einarsson sem er á leið til Blika frá Val.

,,Við erum líka með Óla Íshólm, það verða allir í baráttu og það verður hörð samkeppni. Allt frábærir markmenn og þetta verður flottur hópur á næsta ári sem við erum að byggja upp,“ sagði Ágúst.

Ágúst var svo spurður út í eigin framtíð en sögusagnir hafa verið um að Breiðablik sé að skoða að leysa hann af hólmi.

,,Ég les stundum fjölmiðlana líka og les Fótbolta.net og 433.is og ég hef orðið var við það en ég er ánægður í Breiðablik og við sjáum svo hvað setur.“

,,Hvort það komi einhver betri þjálfari en ég, það verða aðrir að velja það. Mér líður vel og það er ekkert öðruvísi.“

,,Miðað við árangurinn sem við erum að setja þá er ég bara sáttur. Ég er með samning áfram en við erum með klásúlu í samning í báðar áttir þannig við klárum þetta season og tökum stöðuna hvort menn séu ekki sáttir.“