Það gekk ekkert upp hjá goðsögninni Thierry Henry sem þjálfaði lið Monaco í fjóra mánuði á síðustu leiktíð.

Henry tók við sínu fyrsta starfi sem aðalþjálfari en hann náði hræðilegum árangri með liðið og var fljótt rekinn.

Henry segir að það sé ekki auðveld staða að vera í en síminn hans hringdi ekki í fjóra mánuði eftir brottreksturinn.

,,Sem þjálfari þá þarftu alltaf að bíða eftir öðru starfi og það getur verið erfitt,“ sagði Henry.

,,Þetta er mjög pirrandi því þú færð ekki bara næsta leik til að sanna þig eða annað tækifæri strax.“

,,Í lífinu, ef þú dettur þá stendurðu upp og berst. Sem þjálfari hins vegar þá þarftu að bíða eftir því að berjast.“

,,Síminn minn hringdi ekki í fjóra mánuði eftir að ég yfirgaf Monaco og svo allt í einu fékk ég fimm símtöl.“

,,Sumt af því var alls ekki það sem ég var að leita að og í öðru þá hefði ég verið aðstoðarmaður.“