Það er ekkert grín að vinna undir stjórn portúgalska þjálfarans Jose Mourinho.
Mourinho var við stjórnvölin hjá Real tímabilið 2010/2011 er Emmanuel Adebayor lék með liðinu.
Adebayor hefur aðeins tjáð sig um Mourinho og hvernig hann bjóst við gríðarlega miklu af sínum leikmönnum.
Í eitt skipti hafði Cristiano Ronaldo skorað þrennu í fyrri hálfleik en fékk samt sem áður að heyra það frá landa sínum.
,,Hjá Real þá vorum við að vinna 3-0 í hálfleik og Mourinho kom inn í klefann og var brjálaður,“ sagði Adebayor.
,,Hann sparkaði í ísskápinn, í sjónvarpið og kastaði vatni. Hann vildi drepa alla. Hann hraunaði yfir Ronaldo eitt skiptið eftir að hann hafði skorað þrennu.“
,,Hann sagði: ‘allir segja að þú sért besti leikmaður heims en samt spilaru svona illa. Sýndu mér að þú sért sá besti.’
,,Cristiano tók þessu. Ronaldo skoraði kannski þrennu en talaði um færið sem hann klúðraði.“
