Ole Gunnar Solskjær, stjóri Manchester United, heyrði ummæli Roy Keane í gær yfir leik United við granna sína í City.
Keane var ekki ánægður með frammistöðu United í leiknum og sagði að sumir leikmenn hefðu kostað Jose Mourinho starfið hjá félaginu.
Solskjær segist virða skoðun Keane en þeir voru lengi samherjar hjá United og unnu titla saman.
,,Ég og Roy höfum alltaf átt frábært samband. Ég virði hans skoðun, hans skoðun sem hann á rétt á,“ sagði Solskjær.
,,Við spiluðum saman í mörg ár og hann er Manchester United-maður. Þetta særir hann eins mikið og aðra sem tengjast okkur, að við séum eins langt frá City eins og við erum.“
,,Það er mitt starf að sjá til þess að við séum með réttu leikmennina þegar undirbúningstímabilið hefst. Annað er ekki í lagi.“
,,Þegar þú spilar fyrir Manchester United þá er sviðsljósið á þér og þú þarft að leggja þig fram á hverjum einasta degi eins og þeir gerðu í dag. Það er þitt starf.“
