Paul Mitchell, 27 ára stuðningsmaður Birmingham, var dæmdur í 14 vikna fangelsi í síðasta mánuði.

Mitchell varð sér og sinni fjölskyldu til skammar þann 10. mars er leikur Aston Villa og Birmingham fór fram í næst efstu deild á Englandi.

Mitchell gerði sér þá leið inn á völlinn og kýldi Jack Grealish, leikmann Aston Villa sem féll í grasið. Mitchell kom aftan að Grealish og lamdi hann í hnakkann.

Mitchell missti vinnuna og var dæmdur í fangelsi en hann sér þó ekki eftir neinu sem átti sér stað.

,,Þetta var besti mánuður lífs míns. Það var erfitt að vera burt frá fjölskyldunni en annars var allt gott,“ sagði Mitchell.

,,Ég er ekki tilbúinn að ræða hvort ég sjái eftir þessu. Ég mun ekki biðjast afsökunar á neinu.“