Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Margrét Lára Viðarsdóttir, hún hefur átt magnaðan feril, hún er ein allra besta, ef ekki besta knattspyrnukona sem Ísland hefur átt.
Margrét var barnastjarna, sem ólst upp í Vestmannaeyjum. Hún var einn besti leikmaður í heimi en meiðsli gerðu henni erfitt fyrir. Tölfræði hennar með kvennalandsliðinu er svo ótrúleg.
Margrét þurfti eins og aðrir krakkar að taka erfiða ákvörðun á sínum tíma en hún stundaði fleiri en eina íþrótt.
Margrét var bæði efnileg í knattspyrnu og í handbolta og þurfti að lokum að velja aðra íþróttina yfir hina.
Hún segist hafa verið nálægt því að velja handboltann en það er Elísabeti Gunnarsdóttur að þakka að fótboltinn hafi orðið fyrir valinu að lokum.
,,Ég var það alveg [nálægt því að velja handbolta]. Við fengum rússnenskan þjálfara, Mikki hét hann í handboltanum,“ sagði.
,,Hann er sonur Boris, geggjaður þjálfari. Ég var alveg nálægt því, ég var mjög góð í handbolta þó ég segi sjálf frá.“
,,Á þeim tíma sem ég er svona að velja þá er meistaraflokkur í handbolta í Vestmannaeyjum Íslandsmeistari og bikarmeistari, tvö eða þrjú ár í röð. Það hjálpar líka þegar maður er að velja.“
,,Fyrirmyndirnar og titlar. Fótboltastelpurnar voru ekki komnar þangað. Ég var alveg nálægt því.“
,,Það er eiginlega Betu að kenna eða að þakka að ég hafi valið fótboltann. Hún sagði við mig sem var dálítið gott: ‘ef þú ferð á handboltaæfingu þá ertu ekki velkomin á fótboltaæfingu hjá mér sama dag.’
,,Ég man að ég testaði þetta alveg, ég fór á handboltaæfingu og mætti svo á fótboltaæfingu. Hún var búin að senda einhverja njósnara eða mætti sjálf!“
,,Þá var bara þannig að hún leyfði mér ekki að vera með á æfingu. Þetta var alveg gagnrýnt í Eyjum, handboltinn var brjálaður yfir þessu og alls konar.“
,,Þetta ýtti mér út í það að taka ákvörðunina. Ég endaði á að velja það sem mér fannst skemmtilegra. Á þessum tíma var ég komin mjög langt í handboltanum líka.“
