Hannes Þór Halldórsson er genginn í raðir Vals en hann kemur til félagsins eftir dvöl í atvinnumennsku.
Valur staðfesti komu landsliðsmarkvarðarins í dag en hann mun leika með liðinu í Pepsi Max deildinni í sumar.
Ólafur Jóhannesson, þjálfari Vals, var að vonum ánægður er við ræddum við hann eftir skiptin í dag.
,,Það er geggjað að fá Hannes. Hannes er frábær markmaður og er búinn að standa sig mjög vel þessi ár eins og við vitum og ég fagna komu hans,“ sagði Ólafur.
,,Hann hafði samband við okkur fyrir áramót en var ekki 100% ákveðinn hvort hann kæmi heim eða ekki, hann hugsaði um fara á Norðurlöndin og vissi ekki hvort hann myndi losna unda samning í Aserbaídsjan.“
,,Hann heyrði í okkur ef hann hugsanlega kæmi. Svo var það niðurstaðan og þá tókum við upp þráðinn aftur.“
,,Hann er 34 ára gamall og það er oft minna álag á markmönnum svo þeir endast lengur. Hann lítur mjög vel út.“
Ólafur var svo spurður út í Anton Ara Einarsson sem var aðalmarkvörður liðsins á síðustu leiktíð. Hann gæti verið á förum.
,,Þetta hefur engin áhrif á framtíð Antons. Hann er með samning hjá okkur út tímabilið og verður hjá okkur út tímabilið. Ég myndi athuga það mál ef hann biður um að fá að fara.“
