Lassana Diarra, fyrrum leikmaður Chelsea og Real Madrid, hefur ákveðið að leggja skóna á hilluna.
Þetta staðfesti leikmaðurinn í dag en Diarra hefur undanfarið ár leikið með Paris Saint-Germain.
Þessi 33 ára gamli leikmaður gekk óvænt í raðir PSG í fyrra og skrifaði undir eins og hálfs árs langan samning við félagið.
Hann fékk þó ekki mikið að spila hjá félaginu og tók aðeins þátt í 13 deildarleikjum.
PSG og Diarra ákváðu að það væri best að rifta samningi leikmannsins sem átti að renna út í sumar.
Diarra gaf það svo út í kjölfarið að hann væri hættur að spila og eru skórnir komnir upp í hilluna frægu.
Diarra átti ansi skrautlegan feril og lék með liðum eins og Chelsea, Real Madrid, Arsenal, Marseille, Portsmouth og Al Jazira.
