„Við eigum allavegana séns. Maður myndi nú segja fyrir fram að það væri líklegra að Argentína ynni, en ég man það frá því í Frakklandi þegar við spiluðum á móti Portúgal að það voru fáir sem töldu að við kæmum vel út úr þeim leik. Við gerðum jafntefli þá, hví ættum við ekki að vinna þennan?,“ spyr Illugi Gunnarsson, fyrrverandi menntamálaráðherra sem blaðamaður rakst á í Moskvu. Illugi var í bol með númerinu 22, númerið sem Eiður Smári Guðjohnsen spilaði með í Chelsea á sínum tíma.
Illugi treysti sér varla til að spá fyrir um úrslitin. „Ég vona að við vinnum,“ segir Illugi.
Hann segir það kostinn við að vera laus úr stjórnmálunum að þurfa ekki að hafa áhyggjur af því að sniðganga keppnina vegna efnavopnaárásar Rússa í Bretlandi. „Ég er laus með það að geta farið og haft gaman að styðja íslenska landsliðið.“
Hversu langt komumst við í keppninni?
„Maður hefði ekki trúað þessu fyrir tveimur árum að þetta væri mögulegt eins og það ævintýri varð. Eigum við ekki að trúa því að við komumst upp úr riðlinum?“
Viðtalið við Illuga má sjá hér að neðan: