Burnley hefur áhuga á Jay Rodriguez, sóknarmanni WBA en það er Mail sem greinir frá þessu.

Rodriguez hefur verið fastamaður í liði WBA á þessari leiktíð og er hann kominn með 11 mörk og eina stoðsendingu fyrir félagið á tímabilinu.

WBA situr í neðsta sæti ensku úrvalsdeildarinnar með 25 stig og er 8 stigum frá öruggu sæti þegar liðið á þrjá leiki eftir.

Það verður því að teljast næsta víst að WBA sé á leiðinni niður um deild en Rodriguez hefur verið einn af ljósu punktunum í liðinu á tímabilinu.

Hann kom til félagsins frá Southampton síðasta sumar en hann er uppalinn hjá Burnley.