Stoke tók á móti Manchester City í mánudagsleik ensku úrvalsdeildarinnar í kvöld en leiknum lauk með 2-0 sigri gestanna.
Það var David Silva sem skoraði bæði mörk City í dag og hefur liðið nú 16 stiga forskot á Manchester United á toppi deildarinnar.
Pep Guardiola, stjóri City viðurkenndi það eftir leik að hans menn væru ansi nálægt því að tryggja sér sigur í ensku úrvalsdeildinni.
„Við erum nálægt þessu, við erum komnir með 81 stig sem er slatti. Frammistaðan í kvöld var mjög góð og þeir fengu ekki eitt færi í leiknum,“ sagði Guardiola.
„Við vorum mjög öruggir í dag. David Silva stjórnaði leiknum, hann er gríðarlega hæfileikaríkur og stýrir hraða leiksins en þegar reynir á er hann alltaf til staðar.“
„Það er alltaf flókin staða að vera meistari. Þetta félag hefur ekki unnið marga titla í fortíðinni og við þurfum að læra það hægt og rólega. Það skiptir ekki máli hvar við vinnum titilinn, það er ekki eitthvað sem við erum að hugsa um.“
„Ég veit að stuðningsmennirnir vilja vinna hann gegn Manchester United en við erum bara að hugsa um næsta leik gegn Everton. Núna förum við í smá frí og njótum þess að æfa í sólinni,“ sagði hann að lokum.
