Manchester United tók á móti Liverpool í stórleik ensku úrvalsdeildarinnar í dag en leiknum lauk með 2-1 sigri heimamanna.

Það var Marcus Rashford sem skoraði bæði mörk United í fyrri hálfleik en sjálfsmark frá Eric Bailly reyndist eina mark Liverpool í dag.

Jurgen Klopp, stjóri Liverpool var svekktur með að fá ekkert út úr leiknum og vildi fá vítaspyrnu í síðari hálfleik.

„Við verðum að verjast betur, það er klárt mál. Lukaku getur alltaf unnið skallabolta en við þurfum að passa upp á plássið sem myndast fyrir aftan hann,“ sagði Klopp.

„Það er alltaf erfitt að lenda undir, hvað þá 2-0 undir og við náðum aldrei að koma okkur inn í leikinn í fyrri hálfleik. Við vorum að elta leikinn í síðari hálfleik sem er mjög erfitt að gera gegn liði eins og Manchester United.“

„Við áttum að fá víti þegar Fellaini braut á Mane og á svona augnablikum verður dómarinn að taka rétta ákvörðun. Þegar allt kemur til alls snýst þetta um úrslitin og við töpuðum í dag,“ sagði Klopp að lokum.