Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Næsti gestur þáttarins er Þorvaldur Örlygsson þjálfari U19 ára landsliðs karla.

Þorvaldur hefur átt áhugaverðan feril, fyrst sem leikmaður og þjálfari.

Þorvaldur var spurður út í það hvort hann hafi verið mikið í því að kvarta eða væla sem leikmaður.

Þorvaldur lék með Nottingham Forest, Stoke City og Oldham á Englandi á ansi öflugum ferli.

Hann segir að menningin hafi verið allt önnur í Englandi og að það hafi verið ómögulegt fyrir útlendinga að biðja um aukaspyrnu í leikjum.

,,Ekki í Englandi, ég held að það hafi verið kvartað yfir að ég hafi ekki verið nógu harður í Englandi en of harður hérna,“ sagði Þorvaldur.

,,Í Englandi þá var gaman að spila að því leyti til að þú máttir segja meira og dómarinn svaraði bara á móti.“

,,Í dag eru fleiri myndavélar og menn halda fyrir munninn á sér. Það er ekki hægt að neita því ef maður horfir á gamlar myndir að það voru leyfðar fleiri tæklingar, löppin mátti vera hærra uppi.“

,,Það þýddi ekki fyrir útlendinga að biðja um aukaspyrnu þá var kallað dýfa. Ég held að ég hafi ekki verið slæmur í því en ekki barnanna bestur.“