Rúnar Alex Rúnarsson, markvörður íslenska landsliðsins í fótbolta og Dijon í Frakklandi er með hjarta úr gulli. Rúnar er í jólafríi í Suður-Afríku en ákvað að nýta tækifærið og heimsækja lið sem hann hefur verið að styrkja.

Rúnar er nefnilega hluti af Common Goal, góðgerðasamtökum sem Juan Mata leikmaður Manchester United stofnaði.

Knattspyrnumenn setja litla prósentu af launum sínum í samtökin sem sjá til þess að krakkar við erfiðar aðstæður geta stundað knattspyrnu og fleira slíkt.

Rúnar fór og heimsótti lið í bænum Stellenbosch sem samtökin hafa styrkt en með í för var faðir hans, Rúnar Kristinsson, leikjahæsti landsliðsmaður í sögu Íslands og Bjarni Guðjónsson en Rúnar og Bjarni stýra KR saman í dag.

Rúnar mætti á svæðið með KR-búninga fyrir krakkana en rúmt ár er síðan að Rúnar gekk til liðs við Common Goal.