Hjörvar Hafliðason, stundum kallaður Dr. Football hefur farið mikinn í hlaðvarpsþætti sínum sem hefur verið í gangi síðustu vikur.
Íslenska karlalandsliðið í knattspyrnu var til umræðu en liðinu hefur ekki vegnað vel síðasta árið.
Íslenska liðið hefur ekki unnið alvöru leik í slétt ár, liðið vann Kósóvó fyrir ári og tryggði sig inn á HM í Rússlandi.
Síðan þá hefur A-landsliðið ekki unnið leik en liðið náði þó frábæru stigi gegn Argentínu á HM. Síðan þá hefur verið brekka. Ljóst er þó að liðið getur vel snúið við taflinu og farið á EM árið 2020.
,,Þeir eru búnir að vera úti að leika sér í heilt ár, þetta byrjaði allt á þessari Katar ferð,“ sagði Hjörvar í mjög léttum tón í þætti sínum í dag og heyra mátti að honum var kannski ekki full alvara með orðum sínum.
Þar var hann að tala um ferð til Katar í nóvember á síðasta ári, þar spilaði landsliðið tvo leiki og naut lífsins. ,,Sú ferð var eins og Instagram stjörnur saman á ferðalagi í nóvember í fyrra, það fór illa í gamla skólann.“
,,Við erum alltaf sitjandi á einhverjum úlföldum, er ekki búið að vera full mikill leikaraskapur? Þurfum við ekki að fara að setjast niður og vinna. Ég er löngu búinn að greina þetta vesen.“
Umræðuna má heyra hér að neðan.