Jurgen Klopp, stjóri Liverpool hefur tjáð sig um sölu félagsins á Philippe Coutinho sem gekk til liðs við Barcelona fyrr í kvöld.

Kaupverðið er 146 milljónir punda samkvæmt Sky Sports og er hann þriðji dýrasti knattspyrnumaður sögunnar á eftir þeim Neymar og Kylian Mbappe.

Klopp er afar svekktur að missa einn sinn besta leikmann og segir að það hafi verið erfitt að kyngja þessu, þegar að félagaskiptin gengu í gegn.

„Það er erfitt að kyngja þessu en við erum að kveðja góðan vin, frábæra persónu og magnaðan leikmann í Philippe Coutinho,“ sagði Klopp í yfirlýsingu.

„Philippe var mjög skýr við mig, eigendur félagsins og liðsfélaga sína að hann vildi fara til Barcelina. Þrátt fyrir það náðum við að halda honum hér í sumar.“

„Ég get lofað stuðningsmönnum félagsins því að við gerðum allt sem í okkar valdi stóð til þess að halda leikmanninum hérna. Það er draumur hans að spila fyrir Barcelona og því miður gátum við ekki stoppað hann.“ Hann hefur staðið sig frábærlega í þau fimm ár sem hann hefur verið hérna og það er mjög erfitt að kveðja hann.“

„Ég skil mjög vel að stuðningsmenn félagsins eru svekktir og það er alltaf þannig þegar að maður kveður sérstakan leikmann. Þetta er hins vegar hluti af fótboltanum því leikmenn eiga sína eigin drauma og markmið. Leikmenn munu koma og leikmenn munu fara, þannig er fótboltinn.“

„Það er langt síðan að við höfum verið í svona góðri stöðu til þess að bregðast við svona brotthvarfi og við munum gera það. Ég hef verið hérna nægilega lengi til þess að kynnast sögu Liverpool og ég veit að stórir leikmenn hafa farið héðan. Ég hef ótrúlega trú á leikmannahópnum og við munum halda áfram að styrkja hann með eigendum félagsins.“

„Það er erfitt að kveðja Coutinho en á meðan höldum við, sem eftir erum að vinna að því að bæta félagið og vonandi getum við byrjað að skila titlum í hús sem allra allra fyrst,“ sagði Klopp að lokum.