Mikið uppnám er hjá danska karlalandsliðinu í knattspyrnu en samningaviðræður á milli samtaka leikmanna og danska knattspyrnusambandsins (DBU) fóru út um þúfur um helgina. Þeir leikmenn sem höfðu verið valdir til að spila í þeim tveimur landsleikjum sem á að spila á næstu dögum spila því ekki. Í samningaviðræðunum var að sögn aðallega tekist á um auglýsingasamninga og tekjur af þeim auk tryggingamála og bónusgreiðslna til leikmanna.

Samtök leikmanna buðu DBU að framlengja núverandi samning til næstu mánaðarmóta svo hægt væri að spila þá tvo leiki sem eru á dagskrá á næstu dögum en DBU hafnaði því boði og sagðist líta svo á að leikmennirnir hefðu afboðað sig. Nú er DBU að taka stöðuna hjá liðunum í dönsku deildinni til að kanna hvaða leikmenn eru á lausu og geti hugsanlega spilað landsleikina tvo.

Mikið er í húfi því ef Danir mæta ekki til leiks er hætt við að þeim verði vísað úr keppni, bæði í Þjóðadeildinni og undankeppni EM. Ef svo fer verður það dýpsta lægð danskrar knattspyrnu undanfarna áratugi.

Á síðasta ári voru samskonar deilur á milli DBU og samtaka leikmanna kvennalandsliðsins. Það endaði með að Danir gátu ekki mætt til leiks á móti Svíum í undankeppni HM. Þóttu Danir heppnir að sleppa við að vera vísað úr undankeppninni en Svíum var dæmdur 3-0 sigur í leiknum.