Óli Stefán Flóventsson mun hætta sem þjálfari meistaraflokks Grindavíkur að tímabili loknu.

Þetta kemur fram í tilkynningu Grindavík í kvöld en Óli mun róa á önnur mið eftir Pepsi-deildina í sumar.

Óli hefur náð frábærum árangri með Grindavík síðustu ár en hann kom liðinu upp í Pepsi-deildina sumarið 2016 og hafnaði liðið í fimmta sæti á síðustu leiktíð.

Tilkynning Grindavíkur:

Í ljósi umræðunnar sem hefur verið í gangi með þjálfara meistarflokks karla hjá okkur teljum við það rétt að tilkynna að Óli Stefán Flóventsson hefur sagt starfi sínu lausu að tímabili loknu.

Óli hefur unnið frábært starf fyrir knattspyrnudeildina þau þrjú ár sem hann hefur þjálfað hér sem aðalþjálfari og eitt ár sem aðstoðarþjálfari. Við þökkum honum fyrir vel unnin störf og óskar honum velfarnaðar í hverju því verkefni sem hann tekur sér fyrir hendur.

Stjórn knattspyrnudeildar Grindavíkur.