Chelsea tók á móti Crystal Palace í lokaleik dagsins í ensku úrvalsdeildinni í dag en leiknum lauk með 2-1 sigri heimamanna.
Willian kom Chelsea yfir á 25. mínútu áður en Martin Kelly varð fyrir því óláni að skora sjálfsmark á 32. mínútu og staðan því 2-0 í hálfleik.
Patrick van Aanholt minnkaði muninn fyrir Palace á 89. mínútu en lengra komust þeir ekki og lokatölur því 2-1 fyrir heimamenn.
Chelsea er áfram í fimmta sæti deildarinnar, nú með 56 stig og er aðeins tveimur stigum á eftir Tottenham sem á leik til góða.
