Enska knattspyrnusambandið leitar að nýjum þjálfara enska landsliðsins en Roy Hodgson lét af störfum eftir Evrópumótið í Frakklandi. Sambandið hefur nú þegar rætt við fjóra einstaklinga og kemur í ljós á næstu dögum hver verður fyrir valinu. Sex vikur eru þangað til að forkeppni heimsmeistaramótsins hefst og því brýnt að fá niðurstöðu í málið hið fyrsta.
Enska sambandið hefur rætt við Sam Allardyce, knattspyrnustjóra Sunderland, Eddie Howe, hjá Bournemouth, Jurgen Klinsmann, þjálfara Bandaríkjanna, og Steve Bruce knattspyrnustjóra Hull City.
Enskir fjölmiðlar hafa að vonum fylgst vel með gangi viðræðna við umrædda einstaklinga og eru Steve Bruce og Sam Allardyce taldir líklegastir til að hreppa hnossið.