Fjögur mörk í fyrstu tveimur leikjunum – Maður leiksins gegn Arsenal
Marcus Rashford er nafn sem fæstir stuðningsmenn Manchester United þekktu fyrir viku síðan. Það breyttist á fimmtudag þegar Rashford skoraði tvö mörk í 5-1 sigri á Midtjylland og í dag er nafn hans á allra vörum eftir tvö mörk og stoðsendingu í 3-2 sigri gegn Arsenal fyrr í dag. Var Rashford útnefndur maður leiksins á Sky.
Rashford kom óvænt inn í byrjunarlið United í síðustu viku, eða eftir að Anthony Martial meiddist í upphitun. Ef ekki hefði verið fyrir meiðsli Will Keane í bikarleik gegn Shrewsbury á mánudagskvöldið í síðustu viku er alls óvíst hvort Rashford hefði spilað fyrir aðallið United gegn Midtjylland og Arsenal, hvað þá byrjað þessa leiki.
Nafn: Marcus Rashford
Fæðingarstaður: Manchester
Staða: Framherji
Fæðingardagur: 31. október 1997
Gekk til liðs við United: 1. júlí 2014
Rashford gekk í raðir United frá litlu liði í Manchester sem heitir Fletcher Moss Junior. Þaðan hafa öflugir leikmenn komið til United, nægir þar að nefna Wes Brown, Danny Welbeck og Ravel Morrisson. Þess má geta að Cameron Bortwick-Jakcson, annað ungstirni hjá United, lék einnig með þessu sama liði.
United hafði betur í baráttu við Manchester City um þennan efnilega leikmann árið 2014, en hann sló strax í gegn með U-18 ára liði United undir stjórn Paul McGuinness. Hann spilaði vel fyrr á tímabilinu í Evrópukeppni unglingaliða og skoraði til að mynda tvisvar gegn PSV og einu sinni gegn Wolfsburg. Fyrsta markið fyrir U-21 árs lið United kom gegn Leicester skömmu fyrir jól í 6-1 sigri.
Eins og þeir sem fylgdust með Rashford í leikjunum gegn Midtjylland og Arsenal sáu er Rashford fljótur og mjög sparkviss. Hann getur spilað einn sem fremsti maður og þykir ekki síður njóta sín á öðrum hvorum vængnum.
Rashford býr enn heima hjá móður sinni, enda enn aðeins 18 ára. Móðir hans missti af mörkunum sem hann skoraði gegn Midtjylland enda hélt hún að strákurinn yrði á bekknum í leiknum. Þess má einnig geta að Rashford var markahæsti leikmaður U18 ára liðs United á síðustu leiktíð. Hann skoraði 13 mörk í 25 leikjum.
Nicky Butt, fyrrverandi leikmaður United og núverandi yfirþjálfari yngri flokka United, er aðdáandi Rashford. „Hann er kröftugur og mjög hæfileikaríkur leikmaður sem leggur hart að sér. Það er þægilegt að vera í kringum hann því hann leggur mikið á sig fyrir liðsfélagana.“
Paul McGuinness, fyrrverandi þjálfari Rashford, er einnig mjög hrifinn af leikmanninum. Hann segir að framfarir hans hafi verið miklar síðustu átján mánuði. Hér sé á ferðinni spennandi leikmaður sem á framtíðina fyrir sér, haldi hann rétt á spöðunum.
Hér má sjá fyrra markið hans gegn Arsenal og hér er seinna markið.